O interese polos Programas Universitarios para Persoas Maiores (P.U.M.) é un feito imparable. Os efectos beneficiosos para quen participa neles están moi estudados e supoñen melloras siñificativas na saúde física e mental das persoas que teñen pasado a barreira dos 55 anos. A aprendizaxe non pode estar ligado a un período concreto da nosa vida. É independente da idade. A Organización Mundial da Saúde, considera a Educación ao longo de toda a vida como un dos piares básicos dunha madurez activa. O regreso á Universidade en idades adultas, supón un reencontro cos procesos formativos e culturais nun esceario substancialmente diferente ao da xuventude. As
altas doses de motivación, experiencia e madurez, xunto á tranquilidade de saber que non se depende dos resultados académicos para asegurar un posto na sociedade, constitúen unha predisposición persoal única para acadar maiores cotas de coñecemento. Volver ás aulas, ademáis doutros moitos factores positivos, favorece a conexión e o entendemento entre xeneracións. O feito de que este colectivo -en continuo crecemento numérico nas universidades- teña as súas peculiares características fai que, mediante a participación e a colaboración, se determinen problemas, carencias ou necesidades que precisen dunha intervención representativa continua para subsanalos. De todos é sabido que a unión das persoas a través do asociacionismo permite acadar metas que, de seren asumidas individualmente, resultan máis dificultosas e inaccesibles. De aí a súa importancia tamén nos Programas Universitarios de Maiores.
En ASAEXS tomamos iniciativas e realizamos accións de diversa índole, relacionadas normalmente cos campos, educativo, social e cultural, contribuíndo ao medre e avance do noso programa de maiores (P.U.M.) co claro obxectivo final de axudar a construir unha sociedade mellor. Nesta tarefa, a Asociación ten como obxectivo principal -compartido con ou trosorganismos e asociacións cos que mantén lazos de colaboración- mellorar o benestar e a calidade de vida das persoas que a integran, que xa teñen chegado a unha determinada idade e por tanto teñen superada a etapa do compromiso laboral coa sociedade.​​​​​